新到

LC新出嘅紫粉紅色已經出咗一段時間，都唔算瘋癲，仲有貨，上日本官網睇，有幾樣野想買，所以決定自己訂再搵轉運送嚟香港

今日收到郵包

開箱啦

今次送粉紅色磁石，正^o^

酒袋，其實冇諗住用嚟裝酒，但未諗到裝乜

布袋仔，諗住裝手袋入面嘅雜物

個煲仔吊飾好得意

粉紅禮物盒形盅仔

之前一直諗住買嘅碟，要嚟放水果

主角出場啦，紫粉紅心心(^○^)

仲有佢，紫水晶色橢圓形buffet

迷上LC真係好似吸毒，話唔買又買，話收手又收唔到，係咁出新野嚟引誘粉絲出動，今個月開倉，明天又出新野

22cm黑裡粉紅同粉藍媽咪鍋、22cm粉紅buffet，重送粉紅磁石，重唔死？下個月又崇光感謝祭，毒海冇崖呀 T_T

蘇浙滙

通常星期五放咗學，兩個細路會去運動，但因為教練要出遊，所以提早今日去，又因為運動完唔夠時間煮飯，所以會食埋先返歸，今次走咗去蘇浙滙食

環境唔錯

睇個名都知係食咩

素鮑魚，之前有朋友外賣咗一個請我食，幾好食，所以要再安哥，點日本芥辣食，味道好似食魚生

佢唔係叫小籠包，叫湯包，一樣好味

得獎菜紅燒肉配結頁，幾好唔肥膩

兩個細路最愛食炸雞

秘制牛肋骨，好似食西餐

有豆苗食啦，上湯豆苗

唔記得叫咩魚頭鍋，唔錯

全部食物都唔錯，服務好，環境好，一定會再嚟

影片分享

最近經常聽到歌，估唔到咁多年後仍然咁多人識呢首歌，真係好嘅歌，係可以長青嘅

Le Creuset 開倉 2014

又到咗一年兩次嘅開倉啦，通常係三月同九月各一次，香港九龍各一次，今年遲咗，十月先開，三月果陣時有去佐敦個開倉，但係實在太多人，已經係最尾果兩日去，但都要排好耐，入到去仲要再排，所以最終走咗，香港區個開倉唔知點解少人D，通常尾果兩日去都唔使排隊，所以今日尾場去都唔使點排

幾年前去開倉，閒日非繁忙時間去，唔使邀請咭都可以入，又唔使排隊，今時今日，就唔同啦

要有邀請咭先可以入，只要上佢個網站登記，下次開倉就會有邀請咭啦

十二點去到，有十幾人响度排隊，但啱啱開始放人入去

買咗幾年LC之後，要買嘅野越來越少，但都敗咗少少

今日現場最多嘅係南瓜色同肉荳蔻色嘅煲，買咗個16cm煲仔

細細個好得意，南瓜色可以用嚟做萬聖節甜品

想買個20cm平底鑊，但係冇，最細都24cm，$580買個試吓

多種爐具都啱用

睇戲

最近除咗出去食飯之外，都冇出去行街，留响屋企做乜好？睇戲囉

以前未有小朋友，差不多個個星期去戲院睇戲，但自從有小朋友之後就好少去戲院，始終小朋友太細個唔方便去戲院，佢地冇耐性坐兩個鐘頭，而家較大個都會帶佢地去睇吓戲，但都只限一級片，所以我自己多數租戲睇，睇完就算，唔使買到成屋影碟，而且經濟得多

呢套大致上估到嘅故事，劇情好似”大婆俱樂部”

有少少另類但又大卡士，拍攝手法好似Fantastic Mr. Fox 

拍得唔係好浪漫嘅愛情故事

好現代化嘅西部牛仔片

盜賊式喜劇

同以前聽嘅聖經故事有少少唔同，成套戲黑麻麻，呢類戲比較適合响戲院睇

呀女睇咗呢本書話好睇，都幾好

又係警察與連環殺手，個結尾主角同殺手果場戲，應該可以好好睇，但拍得唔好，浪費咗個影后

真人真事改編，信不信由你

X-MEN粉絲，所以一定睇

啱啱出租，第一時間睇，比預期好睇

Zentro

佔中一個星期以嚟，少咗出街，但其實出街都覺得少咗好多人，平時星期日去ifc，一定好多人，冇論食野定買野都好多人，去Citysuper買野想攞架車仔都冇，今日竟然有大量

午餐去咗ifc四樓平台呢間Zentro食

兩個細路都食海南雞飯

十三姨丈嘅漢堡包

我嘅越南牛河，D牛肉熟晒，蘿蔔老過我><"

我係十月之星，可以去CS攞禮物，e-card會員都會响生日果個月有禮物，幾年前都係送圍裙，但呢幾年年年唔同

生日禮物一盒

一盒有三個盅

每個盅入面有一包香草\^^/

Cova

話說十三姨丈上星期收到張優惠卷，去Cova食晚餐有一位免費，十月五號到期，趁今日假期去用咗佢

好靚嘅花花

每人一杯哈蜜瓜汁伙火腿乾

頭盤有沙律或湯，十三姨丈同呀女嘅酥皮白洋蔥湯

呀仔冇叫餐，所以冇頭盤，呢個我叫嘅，但唔記得叫乜

呀仔嘅牛尾雲吞配黑松露醬

呀女嘅牛肉牛骨髓意大利飯

我嘅帶子扁意粉

十三姨丈嘅燴和牛牛肉

呀女嘅雜果撻

十三姨丈嘅橙蛋糕配雪糕

我嘅杧果拿破倫配雪糕