抖吓氣

開咗學好唔得閒，日日忙，吊頸都要抖吓氣，忙裏偷閒出去食個晏

同好JM去咗銅鑼灣試新野

去咗Midtown嘅The Chop House

叫咗兩個set lunch，包括有沙律

重有餐湯，係粟米湯

我食魚

好JM食牛，兩樣都唔錯

當然要飲番杯咖啡啦(^o^)

食完飯，慢步行去L. Place嘅ATUM Desserant食甜品

個場新開，都幾細，但都坐滿晒，食嘅係新派甜品

先送每人一杯海鹽西瓜汁

甜點係响你面前整，一路整一路介紹材料，如果唔啱食可以改第二樣，都幾好食，幾得意

風球下的晚餐

隻海鷗飛走咗啦，十點幾改掛三號，除咗學生唔使返學之外，要返工嘅都要匆匆返工，兩個細路唔使返學，黃昏去咗運動，運動場冷清清，雖然冇落雨，但係個地下都係濕嘅，所以冇乜人，運動完去食埋飯先返屋企

去咗新鴻基中心嘅Ramas，可能因為打風嘅關係，成間餐廳冇一個客，我地包場食

餐廳嘅佈置有D似婚宴場地

麵包熱嘅，GOOD

有蔬菜條，蘿蔔好甜

叫咗兩隻生蠔，OK

個個唔係太肚餓，叫兩個晚餐share食，粟米湯，唔錯

西班牙紅蝦、北海道帶子意粉，隻帶子好生

龍蝦拼肉眼扒，隻蚶起咗肉，唔使食到嘴損

海鷗

今次打得成風啦，八號風球啦

其實噚日都好大風，今日重勁，兩個細路放學返嚟，搭lift上嚟果陣，大風到關唔到lift門，嚇親呀仔，其實都唔係第一次關唔到門，每次打大風都會有機會關唔到門，因為我地住近海，好食風，個lift門俾風吹住合唔埋，要用手推先至關得到

雖然八號風球，不過睇隻海鷗嘅方向，應該好快打完

一打風，個個cap吓圖

呢張好應呀，因為次次都係好早落波

哈哈哈，係呢，點解個個都用李嘉誠嘅？

打風响屋企有咩好做？睇戲囉

呀女放學叫埋佢個鄰居同學仔過嚟，睇呢套Mean Girls，我睇過啦，但佢地未睇過，幾位女角今日都有唔同嘅成就

食完飯睇多套美國隊長

我用Apple TV睇，都幾方便，一家大細出街睇戲，平平地都要兩三佰，買隻影碟都要一佰幾十，租就最好，新戲廿八，舊戲十八，經濟好多

一億五

噚日史上最強，一億五仟萬六合彩開彩，終於有人中，由中秋金多寶八仟萬冇人中，到噚日一億五仟萬，兩注中，每人八千幾萬，真係勁，可以環遊世界，唔使做

我就要繼續做，兩個細路重未做晒功課，匆匆食個午餐就要返去同佢地做功課，去咗ifc嘅Asian Twist，以前佢地有多士、麵包食嘅，但冇咗啦，下次應該唔會嚟，因為兩個細路唔太鍾意食咖哩類嘅食物

好彩仲有美祿恐龍，兩個細路最愛

當然要食叻沙，佢地嘅叻沙都唔錯

咖哩雞跟飯，辣辣地都OK㗎

唔記得咩雞肶配黃薑飯

炒米粉配魚餅、腸仔同雞蛋，叫俾呀仔食，因為佢鍾意食腸仔，但佢最終都係食剩一大碟，唔多啱佢食

是日敗物

又又見橙色盒子

Sisal rectangular buffet，劍麻色長方形鍋，我記得呢個長方形鍋响日本出嘅時候，我覺得幾靚，因為我較鍾意matt色煲，而且未見過LC長方形鍋係有蓋，心思思想買，但個色唔算好鍾意，所以諗了又諗，點知諗諗吓賣完(O_O)

後尾响eBay見到，但係貴到冇朋友，咁貴當然唔會買，點知上星期有代購响日本outlet見到，仲平過之前個正價，唔使再諗，買！

紫粉色的心

是日星期六

兩個細路開咗學，又開始忙，都唔得閒上網四圍瀏，今日得閒D，上網睇吓近日有乜新野，嘩，紫粉紅心心鍋呀(^○^)

好靚啊(*^^*)

重有粉色磁石（≧∇≦）

九月二十四日開賣，唔知係咪限量呢？已經有代購可以代訂，但上次搵個代購買野，佢有太多客人訂貨，佢買晒舖頭D貨都唔夠分俾客人，如果唔係限量，可以搵好JM幫我買，因為佢十月頭去日本，另外崇光感謝週應該會有，不過崇光次次出心煲花煲都限量，一係要排隊一係要抽籤，買到嘅機會好微，所以搵代購機會大D，睇吓開賣情況再算

晚餐去咗SML食，呢間餐廳食物嘅份量，係分大中小三種，你可以按照自己嘅食量叫邊種大細

脆炸魷魚，中量，呀仔最鍾意食炸物

Spaghetti carbonara，小量，呀女嘅

Lemon Garlic Chicken，呢個冇分大小，得一個份量

Lobster risotto，中量，係我嘅

SML Sundae，呢個都冇分大小，一個份量

Caramel date pudding，中量

Swiss chocolate ice cream，一球，呀仔嘅

廚櫃餐

又落雨，一到星期五就落雨，有幾個星期都係咁，落雨天，冇事冇幹都係留响屋企，少少肚餓，睇吓廚櫃有咩野食

廚櫃通常有乾糧，咦，有罐罐頭雞咀豆，再睇吓雪櫃有咩野，有食剩半條嘅西班牙臘腸，有D香草同檸檬，嚟個簡單廚櫃餐

材料有一罐雞嘴豆、半條西班牙臘腸、檸檬、蒜頭、芝士同羅勒葉

雞嘴豆隔去水份

又出動雪紡紛紅skillet，白鑊將臘腸煎一煎

煎到出晒油，加入蒜片同檸檬皮絲炒一炒

倒入雞嘴豆，因為已經係熟嘅，煮番熱就得啦

放入羅勒葉同半個檸檬汁

刨少少芝士响面，食得啦，因為所有野都有味，所以唔使再調味

是日敗物

又見橙色盒子

雪紡粉紅花花煲(^o^)

話說香港响九月一號限量發售雪紡粉紅花煲連花盆套裝$2788，心思思想去敗一個，因為我想要花煲又想要花盆，朝早起身，諗緊幾多點去排隊好呢，上網見到有韓國代購有得賣，平一佰蚊但冇花盆，如果另外買個花盆就會貴過花盆套裝，但係去排隊唔知要排幾耐，又唔知夠唔夠貨，驚去到話賣晒，左諗右諗，最終決定搵韓國代購買，因為兩邊都話數量有限，咁我同代購講話買，佢可以即刻答到我話有，去LC Shop太多未知數，唔博啦，坐响屋企等收貨好過啦

女人街

呀女做功課，要介紹香港嘅其中一條街道，佢打算介紹女人街，但係佢只係曾經經過女人街，從來未行過，所以我地今日專程去行吓

我都好多年冇行女人街，以前嘅女人街，真係賣女人野，衫褲呀、鞋呀、手袋呀，價錢又平，我都行過好多次，但後來女人街變咗遊客街，有好多野賣得貴過其他地方，身為香港人，當然唔會用遊客價來買本地貨啦

行咗一陣，影咗幾張相就走，去咗藏戶食晏

飲sake先選酒杯

呀女幫我𢵧咗呢隻

我叫咗八件壽司配烏冬，意料之外幾新鮮喎

呀仔嘅燒鯖魚定食

呀女嘅三款手卷配烏冬

十三姨丈嘅天婦羅燒牛肉餐

食完飯行咗一陣街，見到呢兩隻狗狗，好多途人欣賞，主人直頭企定定，俾人影佢地