大除夕2014

又到咗一年嘅終結，拜拜2014，迎接2015，過去一年，香港發生咗好多唔開心嘅事，回顧自己過去一年，亦冇乜特別開心嘅事，唔開心嘅就有，希望新一年每個香港人都開開心心

除夕夜，唔想同人逼，去咗數碼港嘅姬子皇朝食晚飯

小食有話梅花生

湯料都好足

杏汁花膠豬肺湯

叉燒拼燒腩仔

XO醬炒蝦球

蒜蓉蒸班頭腩

西蘭花炒班球

鹽焗雞

生炒糯米飯

甜品係芝麻糊

食完飯走咗去睇戲

新年快樂\^O^/

嘉年華

趁仲放緊假，走咗去嘉年華玩，因為要就十三姨丈放工，所以黃昏先至去，入口响近碼頭迴轉處，入場費大人$125包十個金幣，十七歲以下小童$90包七個金幣

入口响摩天輪隔離，夜晚睇幾靚

一入場就見到旋轉木馬，唔多人

呀仔想玩跳彈床，但見到個彈床好BB咁又話唔玩

滑梯，行上上面再坐塊厚坐墊滑落嚟，呀女原本想玩，見到滑落嚟嘅小朋友好細個，佢話太BB，又冇玩到

室外溜冰場，兩個都話唔玩，因為平時個個星期都溜

踫踫車唔知係冇開定冇人玩

有個表演台

旁邊有個台俾人影相，係一塊鏡嚟，D人瞓响地下，個鏡反映上去，好似响間屋嘅露台咁，幾得意，好多人排隊影，十三姨丈唔想排，所以冇影到

食物方面，都係食快餐

最多嘅係攤位遊戲，有部份係用金幣，有部份係用銅幣，一個金幣可以換兩個銅幣，响攤位度換就得啦

整體嚟講，唔係好啱我地玩，好多機動遊戲係俾細D嘅小朋友，有少部份係大人玩嘅，所以唔啱我地，呀仔玩小朋友機動遊戲又太大個，呀女玩大人機動遊戲又太細個，可能係閒日又係夜晚，有部份機動遊戲冇開，相比起幾年前果個嘉年華，呢個比較遜色

禍不單行

噚日又發生航空事故，又係馬來西亞公司，一年内發生咗三次，真係福無重至，禍不單行

今年三月，先發生飛機失蹤事件，當時覺得好震驚，點解咁大架飛機會失蹤？呀女啱啱一月先去完馬來西亞，而且都係坐馬航，所以對呢件事覺得感同身受

雖然話飛機係全球最安全嘅交通工具，但當時覺得坐飛機真係好唔安全，出外旅遊嘅意欲都冇埋

有時D野真係點都估唔到，極少有同一間航空公司响咁短時間發生兩次嚴重事故，點知响七月，馬航又發生飛機被擊落

一不離二，二不離三，噚日又竟然再發生航空事故，又係馬來西亞嘅航空公司，亞洲航空一架飛機失蹤，應該係遇到惡劣天氣

希望家屬們節哀順變，死者安息，永遠唔會再有航空事故U.U

迪士尼樂園

今日港鐵堅尼地城綫通車啦，如果唔係咁啱入咗嚟迪士尼，一定會去搭吓

住得迪士尼酒店，當然要去埋迪士尼樂園，今日食完早餐，就過去玩，天陰陰，好彩冇落雨，假期嚟講都唔算多人，有D人話，因為中環有個嘉年華，所以少咗人入嚟，唔知係唔係呢

入口車站必定影一影，最近睇套戲，五六十年代嘅美國迪士尼個入口都係咁，隻米奇一樣，個面粉紅色

好多汽球，已經有Big Hero 6，當然唔少得呢期最熱門嘅兩個姐妹Elsa同Anna

必睇4D影片，唔知點解，我硬係唔記得個名

行吓灰熊山莊，好大塊金，真係搵到咁大塊金就唔使做

去咗唔記得叫乜野屋^^"

兩位主角出場，Elsa還可以，但Anna真係好唔似，今日都見到有幾十個小妹妹打扮成佢兩位，好可愛

第一次睇夜間巡遊

幾好睇，可惜短咗少少

迪士尼酒店

聖誕節唔出門，但响屋企又其實幾悶，所以決定去迪士尼行吓，住番一晚

今次係第二次入嚟住，幾年前入嚟住過一次，果陣時新開，所以入嚟住吓睇吓

兩次都係住迪士尼酒店

大堂一顆大聖誕樹

房間算唔錯

有露台有海景

日用品齊全

沖涼用品亦齊

嚟得迪士尼酒店，當然要去翠樂庭食飯

冷盤

熱盤

另一邊熱盤

唔少得應節食品，火雞

甜品枱，有兩隻朱古力熊仔Duffy同ShelliMay

好可愛啦～

聖誕節2014

聖誕節啦，今日起身頭痛，唔知關唔關噚晚D香檳事呢，頭痛到爆，食咗好JM响日本買俾我嘅止痛藥就冇痛啦，呢隻藥－掂!!

噚日香港發生咗解款車跌錢嘅新聞，乜咁兒戲嘅，解款車冇關門都冇警告聲嘅？

嘩，真係不可思議

今日都係自煮聖誕餐，四人晚餐

簡簡單單煎幾塊澳洲和牛

頭盤煎鴨肝

白鑊煎得嘞，因為好多油出

用上次响Pierre Hermé買嘅冬日果醬做汁

煎肉眼扒伴露絲瑪莉焗薯，再加烚雜菜

食完飯，開禮物啦

個大盒原來係－推拿腳肌

隨機附送香芬

朋友send俾我嘅圖，咁快就有人整咗圖

笑咗，希望人人有個開心快樂嘅聖誕節\^0^/