佔中

星期日正式開始佔中行動，呢幾日排山倒海嘅報導，謠言滿天飛，見好多人因為不同己見而駡戰，其實每個人都有自己嘅意見，大家應該互相包容，我亦唔打算响度多講，只希望大家心平氣和，理性咁去解決問題

明天假期，晚餐出去食，去咗ifc嘅どん吉，前身係銀座梅林，都係食炸豬扒為主，以前未有勝博殿之前，どん吉嘅炸豬扒可以話係最好食

餐前小食，唔記得叫乜^^"

呀女嘅吉列豬扒餐

呀仔嘅吉列豬柳餐

我嘅鹿兒島豚肉餐

十三姨丈嘅吉列豬扒伴大蝦餐

另外叫咗個炸軟殻蟹，好飽

Pepper Lunch

是日星期六，十三姨丈噚日俾咗本美食地圖我，咁梗係睇吓有乜好食啦，見到介紹話數碼港商場有間Pepper Lunch，我地一家都鍾意食，日本嘅Pepper Lunch我地冇去過，係去過新加坡同香港，香港去過幾間Pepper Lunch，間間都好多人，又要等位，又要排隊，但數碼港最出名嘅係⋯冷清，個商場經常得好少人，咁咪唔使等位同排隊囉？好，去睇睇

隨U週刊送嘅美食地圖

去到商場，嘩!!星期六都唔使排隊，正呀，重有大把位坐

呀女叫咗一號餐，加大咗個份量俾佢

呀仔嘅三文魚餐，加咗芝士

十三姨丈嘅漢堡扒餐

同我嘅肉眼扒餐，全部清碟冇浪費\^0^/

今日商場有音樂演奏表演，我地去到果陣未到表演時間，所以未有得睇，今日仲有放風箏表演

現場有好多風箏賣，可以買咗出去草地玩

我地冇準備，所以冇玩到就走咗啦

神屋流博多道場

今個星期真係忙，日日都有野要做，又或者要去學校咁，嚟到星期五，終於可以抖一抖

忙咗成個星期，星期五出街食晚飯，去咗世貿中心嘅神屋流博多道場，個名咁鬼長嘅

先嚟個博多雲糖鍋，其實啫係sukiyaki牛肉鍋，响個鍋上面放咗舊棉花糖，受熱後會溶咗入湯裏面

五款魚生，普普通通

黑毛和牛肉眼，menu張相靚好多

一口餃子，麻麻

厚切煙肉，呀仔鍾意食煙肉，呢個為佢而叫

脆炸生蠔，個粉漿厚咗D

豉油味豬骨湯拉麵，OK

埃瘋

話說埃瘋6開始發售，好多人話買嚟炒，因為大陸未有得賣，有得炒，我冇諗過炒蕒，淨係知道要買都唔容易，因為好多人搶

我都想換部大D，而家風頭火勢，過一排睇吓口碑好唔好先決定買邊隻好

今日約咗一個好耐冇見嘅好JM食晏，去咗ifc嘅Greyhound Cafe

叫咗個鹹牛肉意粉

冬蔭公意大利雲吞，差不多食完先記得影

招牌單骨雞翼，樣樣都好味，係份量細D啫

食完晏，食甜品，原來好JM都鍾意Angelina

一人一杯朱古力，正～

檸檬撻，個撻皮唔係第二度食果D咁硬掘掘，係軟嘅，唔係淋咗，係軟身嘅，好味

好JM叫嘅唔記得叫乜野Paris，果仁味嘅，好JM讚不絕口\^^/

帶飯

呀仔明天要帶飯返學，其實冇乜野啱佢帶飯返學食，學校得半個鐘時間，佢食飯又慢，所以要帶D簡單易食嘅，簡單D，台式肉燥飯

自從去台灣食過肉燥飯，兩個細路都鍾意，自己整都唔難

材料一般屋企都有，淨係買D肉就得啦

用Kiwi色20cm Bis，燒熱油約一湯匙，炒香半個蒜頭份量嘅蒜粒、三個切咗粒嘅紅葱頭

加400g瘦肉炒至轉色，贊酒

加四湯匙生抽、一湯匙老抽、兩粒八角、一粒冰糖，冰糖大約一個五蚊銀咁大

煮滾後收細火，煮到收剩一半汁，試味

掉咗八角，攪掂(^^)

我都要食番碗，用綠色碗襯番個煲

飯袋都係綠色，亦都係LC(*^_^*)

硬幣回收

經常找錢找埋一大埋毫子，有時散子包太重就將D毫子放低响屋企，堆吓堆吓太多毫子响屋企，唔係講笑，女皇頭毫子都有

以前我會將毫子用嚟入郵票機買郵票，但時而世逆，而家連郵票機都唔收毫子，毫子已經冇乜存在價值，因為好多舖頭都唔收毫子，屋企嘅毫子得個擺字

政府而家攪個硬幣收集計劃，可以將D硬幣換紙幣，真係太好啦

兩個細路都鍾意食壽司，今日晚餐去咗金鐘嘅白鮨試試

唔係太肚餓，叫咗少少壽司

又再叫少少壽司同手卷

五式串燒

炒雜菜

豬骨湯拉麵，個湯幾好飲

分裂

今日蘇格蘭公投有結果啦，最終反對獨立嘅人多D，所以蘇格蘭將不會獨立啦

我對英國嘅政治唔了解，亦唔太關心，只係覺得一個國家要分裂，就好似一個家要分裂咁

晚餐去咗銅鑼灣食，上次去Midtown見開咗好多新食店，今次試吓韓國餐廳伽倻

之前响時代廣場對面，而家搬咗，係咪搬咗呢？定係開多間呢？都冇留意舊果間重有冇响度

叫咗燒大蝦

特級燒牛肋肉，叫咗兩碟，一碟係一定唔夠食

燒雞肉

兩個細路好鍾意食紫菜

全部肉，加番碗蔬菜

十三姨丈最愛人蔘雞湯

兩個細路最愛韓式牛肋骨煲，呢間差少少