上癮

聽人講，去開倉係會上癮嘅，我信，因為我覺得我都上咗癮

話說今日要去學校兩次，朝早去完，下晝又去，中間幾個鐘頭唔三唔四，返屋企嘅話，一陣間又出過去，唔返屋企嘅話，幾個鐘頭去邊？咁梗係去開倉啦，最後一日，原本諗住開俾公眾會超多人，點知係冇乜人，所以心思思又走去八吓

今次直入二號廳等，唔使企街

紫色crock，我冇用開，諗住用嚟做花樽

藍色深花碟，我其實唔太愛花花碟，JM叫我買咗先，睇吓有冇得同人換其他野

粉色深花碟，我原本都諗住買番對花碟，但個心係等緊出MP色

紫色batter bowl，我已經有個粉紅色，但紫色真係靚

全部一仟有找，算平，以前覺得排咁耐隊入去，雖然話平D，咁花時間心機，又要搶又要逼，我寧願俾貴D平時買，所以我以前都係揀最少人嘅時段去開倉，亦次次都冇野買，但係上次同好JM去完，發現原來開倉有好多貨品，係根本冇响香港LC店賣過，好多係外國先有，好似今次好想買嘅BBQ platter，我之前响美國見過都有想過買，但係顏色唔靚，所以冇買，今次開倉竟然有紫色，仲要平過美國，但係好難買到，要尋寶咁尋佢，如果尋到，個滿足感真係好大ga

雖然開倉曲終人散，但係請放心，LC係唔會俾機會粉絲暫停敗家嘅，又嚟新出特價套裝啦

支持乳癌基金嘅粉紅色系列又出動

心心buffet，之前情人節出過，$25xx連三個心形盅，而家又出，仲平咗添

仲有呢套，顏色好靚，我淨係想要匙羮咋，今日啱啱完咗開倉，聽日又開始發售粉色系列，下個月又到崇光感謝週，LC對於點樣用盡粉絲嘅錢，真係不遺餘力(T . T)