芥末豬扒

兩個細路上午學完野，下午又要去學野，所以時間緊迫，只好同佢地去麥記食個快餐，佢地最鍾意去麥記，我就唔太愛，唔係我長大後唔鍾意，而係由細到大都唔鍾意，好多人話：「個個細路都鍾意食麥記」，唔係㗎

整個簡單午餐，mustard pork chop with gnocchi

豬扒兩塊，芥末醬，double cream，apple cider，gnocchi

豬扒用保鮮紙包好，用rolling pin打薄一半

落油加幾片蒜頭爆香

豬扒兩邊煎至金黃取出

水落鹽煲滾，落gnocchi煮至浮起，取出隔去水份

豬扒取出後，原鑊落cider半杯，芥末一湯匙，半杯double cream煮滾，倒入gnocchi兜勻

拌豬扒食，攪掂

個份量夠兩個人食，唔使半個鐘食得

今日試咗Gellack，同之前我買嘅gel差不多，Gellack比較薄身D快乾D

太古城

今日去太古城食晏兼shopping，因為Apita大裝修，令個商場開咗好多新店，原本四層嘅Apita，保留B1同G兩層，1樓改咗做Marks & Spencer，2樓改咗做Log On同Ice Fire，保留落嚟嘅G同B1有部份裝修咗，G開咗間Greyhound，Pokka亦裝修咗，其他有少部份係換咗位，好多都响原位冇變，另外响商場嘅屈臣氏冇咗，會改做Franc Franc

我地去Pokka食晏，等位嘅時候撞到朋友，傾傾吓又撞到另一個朋友，咁啱嘅，個個都嚟睇吓行吓(^o^)

去Log On行吓，幾多人，買咗最近幾多人用嘅Gellack試試

我有一排都有玩吓gel甲，gel甲比較容易，最麻煩係拆甲，呢隻gel話好容易拆，$499有晒led燈、gel甲、拆甲同埋送一張gel甲班coupon，都幾抵

晚餐去咗井川日本料理，魚生都好新鮮，唔錯

影片分享

最近看到的一個影片，好可愛的兩公婆

最愛朱古力

朝早收到好JM WhatsApp俾我，原來法國朱古力名店ANGELINA响ifc開咗，係我最鍾意嘅朱古力啊，啱啱JM先去完法國，重買咗佢隻朱古力粉俾我做手信，而家唔使去法國先有得飲，香港有就當然要試試

去到原來午餐已經滿座，唯有去其他地方食，之後再返去下午茶

去咗一期嘅GOGYO食拉麵，我叫咗淡麗鹽拉麵

呀女叫咗白拉麵

JM叫咗赤拉麵，冇影到相，午餐除咗拉麵，重可以跟魚生飯或壽司或沙津，我叫咗魚生飯

佢兩個叫壽司，又冇影到，食品普通，份量較細，呢度前身係和歌山，屬於味千拉麵集團，唔知呢間係咪又係佢地集團呢？

好啦，到主角啦

去到嘅時候唔算多人，得幾個人等位

我地叫咗兩杯熱朱古力

兩件Mont Blanc

呀女叫咗果汁同macaroon

我第一次飲係朋友响法國帶返嚟嘅手信，我原本冇諗過飲，只係沖俾呀女飲，我跟佢鑵面嘅沖法，但我覺得粉嘅份量咁多嘅？所以改咗落少三份之一粉，沖出嚟好好飲，一飲愛上，不過今次响店飲嘅，應該就係跟返原本個份量，所以我覺得係濃咗D，Mont Blanc好甜，外國人嘅口味始終同我地唔同，佢地受到好甜，但如果改到適合香港人嘅話，又會失去原來嘅法國味

朱古力呢，都係買返去自己沖出自己啱嘅味道就最好

霸王川莊

好少同屋企人出去食辣辣川菜，原因好簡單，佢地唔.食.辣

前幾日睇報紙，見介紹呢間新開嘅川菜，十三姨丈雖然唔食辣，但都提議去試吓，因為唔係得辣野食，都有唔辣嘅

今晚去試一試佢，地點响威靈頓街嘅商業大廈，成間店都好暗，先來一杯八寶茶，幾碟小食都唔錯，侍應非常好服務，真係近年少見咁好，聽聞依家飲食業難請人，所以好侍應難求

我地叫咗冰鎮天麻，似白蘿蔔，冇藥材果陣味

我叫咗酸辣湯，唔太辣，但好細碗

唔辣嘅有呢個，唔記得個名叫咩野炒牛肉，OK

侍應介紹：茶香雞鴨戀，鴨肉下面係雞肉，唔錯

唔記得叫咩嘅豬肉，普通

當然要叫個辣嘅水煮桂花魚，好味，我覺得唔太辣，但十三姨丈話辣到標汗

甜品叫咗拔絲香蕉，响你面前拔絲，侍應叫呀仔試吓，呀仔唔試，呀女試，其實拔完絲浸冰水，已經冇晒絲嚕

是日敗物，收到之前買嘅LC磁石，係Mineral系列，最愛那個cotton白色

上課去

暑假開始咗，第一時間帶兩個細路去剪髮，呀仔D頭髮長到睇唔到野啦

剪完髮去K11行一陣，咁熱，梗係要去Smile食番杯froyo啦

我叫咗呢期熊貓熱嘅Panda Froyo，呀女叫咗朱古力味，呀仔冇食，男仔係冇女仔咁鍾意食甜品

今晚同十三姨丈報咗個攝影課程，因為買咗新相機唔識用，响銅鑼灣上堂

上完堂明白好多，但係重有好多唔識U_U

之後近近地上樓上和三昧食飯，因為已經十點，所以冇食鐵板燒，叫咗兩個套餐

魚生餐，唔錯

燒牛肉餐，都幾好

夏天

原來又好幾個月冇寫野，呀女上咗中學之後，忙到飛起，家陣放暑假又得閒D

我鍾意夏天，因為可以去游水，因為天朗氣清，因為夏天有種溫暖愉快嘅感覺

我唔鍾意夏天，因為熱．到．爆（・□・；）

今日行過公園，見到個涼亭，好似瀑布咁，有水流落嚟，好涼快

兩個細路入去玩咗一陣，成腳濕晒

是日敗物，收到早前上網買嘅黑色chopping board

想買紅色Kelly款，可惜買唔到，黑色個款冇咁靚，但都買咗三塊，兩塊送人，一塊自己用

踩單車

原來冇寫blog個幾月，冇辦法，兩個細路一返學就好多野要做，好似打仗咁，同埋唔寫開呢，條懶根生咗出嚟，就開始懶得寫(￣▽￣)

是日星期日，上星期日同兩個細路去踩單車，呀仔開始學兩個轆，經過一輪練習，都踩到幾吓，但黃昏開始天黑，唯有走人，趁佢識識地，今個星期再嚟，叫做識踩，但起步重係要人幫

出咗去成日，晚飯當然出街食，去咗西環尾呢間Jaspas，主要食西餐，西環開咗好多食肆，水準都唔錯，呢間都係，不過以西環區嚟講，係貴

Linguine Seafood Marinara，不過不失

Angus Beef Burger，唔錯，呀仔差不多KO晒

Spaghetti Bolognese，普普通通

Grilled King Prawns，淡咗D

Aussie Pavlova，好大碟呀，冇諗過甜品咁大碟，好彩唔係一人叫一碟啫

Banofi Cake，我冇食，食唔落啦，原來重有brownie送，早講吖，唔使叫甜品嘛^^"