超簡單懶人肉醬意粉

某日响電視睇咗米芝蓮三星名廚Heston Blumenthal嘅節目In Search of Perfection，講佢將一D平常嘅菜式，好似炸薯條、肉醬意粉、漢堡包咁，用佢認為最好嘅食材、方法，做到佢心目中最完美，每一種食材都經佢研究測試，例如肉醬意粉，用邊個部位嘅肉，用邊種香料，請教佢認為煮肉醬意粉煮得好食嘅意大利廚師，點樣煮幾個鐘去煮好個肉醬，測試邊隻意粉好，等等，過程真係好認真好科學，唔怪得佢可以做名廚（＾ν＾）

個節目幾個月前睇，好多野唔記得，但我就記得佢測試意粉果part，佢試咗幾隻唔同牌子嘅意粉，佢認為其中一隻最好，佢發現隻意粉表面比較粗糙，而其他都係好平滑，於是，走去意粉廠訪問佢地，負責人帶佢去廠睇，佢話佢地嘅意粉係用銅模壓粉，而家好少廠用銅模，多數用膠模，因為成本較低，而用銅模壓嘅意粉，表面會較粗糙，因為咁，會令肉汁黏住意粉，唔會粉還粉，汁還汁

早前响Apita行超市，見到呢隻意粉，同節目講果隻個樣一模一樣，但唔知係咪同一牌子，因為電視冇放大個牌子名，正當我睇睇吓嘅時候，promotor埋嚟介紹，話佢地嘅意粉係用銅模壓粉，係？咁真係要試試

買咗意粉、扁意粉、即食risotto試試，送咗樽茄醬

試吓來個超簡單懶人肉醬意粉

免治豬肉加茄醬，煮好肉醬，啱啱好用晒一樽

再煮埋個意粉

超簡單嘅懶人肉醬意粉就完成咗

既然係懶人肉醬，味道真係冇乜特別，淨係得個茄汁味，下次都係要整番個認真版，不過意粉又真係幾黏汁喎，GOOD(^O^)