和民

是日星期六，又係忙碌嘅一日，好鬼攰，喉嚨有D痛，死火，作病(@_@)

夜晚出去食飯，經過公園，見到有花燈同攤位遊戲，噢！仲有一個星期左右就係中秋節，真係快

去咗和民，十三姨丈好鍾意去和民，因為貪佢選擇多、價錢平

六式刺身，不過不失

燒鯖魚，OK

章魚丸子，諗起第一次去日本，第一次食嘅街頭小食就係佢

串燒盛合，五款雞串

牛肉鍋，我好鍾意食牛肉鍋，第一次食係响友和，當時可以選擇自己煮或者佢幫你煮

炸一口番薯，點茄醬當甜品食

叫咗杯熱情果綠茶，好大杯啊(O_O)

九十年代

噚日睇電視，响國家地理頻道做嘅一個節目，叫做我們的九十年代，分幾集做，講返九十年代發生嘅大事，呢個係美國節目，所以講嘅都係發生响美國嘅大事，中間穿插一D人嘅訪問，有政治人物、名人、名星、記者、甚至係當事人，噚日睇果集有前美國總統克林頓，講佢同萊溫斯基嘅醜聞，萊小姐都有出現，佢當然係大個咗成熟咗

九十年代係電腦發展嘅年代，好多人仲記得以前上網要連線，等連線時嘅電話聲，差D忘記咗以前要連線，佢一講我又記起

當年蘋果iMac一出，真係無敵呀

當年嘅辛普森，咁都唔使坐，美國嘅司法制度真係奇怪

重有戴安娜嘅死，當年係1997年，啱啱香港回歸中國，九七年真係發生咗好多事

除咗新聞大事，亦有娛樂大事

九十年代好紅嘅電視節目，老友記，佢地六個今日都重响娛樂圈

當然重有好多其他事，科網股泡沫爆破、中東戰爭、校園槍殺案、Hip Hop音樂等等，講起音樂，一首歌真係响九十年代好紅，而家有時去party都重會聽到佢

影片分享

電視入面介紹呢首歌嘅時候，中間受訪嘅人都識跳番幾part

露絲瑪利焗雞翼

今日開始新學年，兩個細路一返嚟就話好肚餓，我都估到啦，所以趁佢地未返嚟就整定野俾佢地食，baked chicken wings with rosemary and potatoes，露絲瑪利焗薯仔雞翼，露絲瑪利同雞嘅味好夾，我好like

材料有雞翼、薯仔、露絲瑪利、檸檬、胡椒粉同鹽

將雞翼洗淨抺乾，薯仔兩個去皮切塊，唔好太大塊，太大塊驚焗唔熟，連埋露絲瑪利舖响焗盤

灑上鹽、胡椒粉、一個檸檬嘅皮刨絲、然後淋橄欖油响面

入爐焗四十分鐘

掉咗大條嘅露絲瑪利，食得，極速清碟

美國又出新色花花煲

上次係紫水晶色，今次係礦物藍色，相比起香港，真係平得多，有代購可以代敗，不過隻色唔係太吸引，未有想買嘅衝動

蝦叻沙

兩個細路聽日開始返全日，今日重係放早，放學返嚟，匆匆煮D通粉佢地食，就去上堂，今日最後一堂暑假班，明天正式開始新學年啦

上次食剩四隻虎蝦，諗住今日用兩隻嚟煮個叻沙做午餐，頭先想去買豆卜，賣晒喎，咁唔落豆卜都得嘅

我以前唔食叻沙，因為覺得唔好食，有一次去我有一個馬來西亞朋友屋企食飯，佢煮咗D叻沙俾我地食，覺得好好味，原來叻沙唔係唔好食，係要睇吓煮得好唔好，之後就開始鍾意食叻沙

响超市買嘅叻沙，個樣睇落唔錯，買一包試吓

18cm cotton媽咪鍋開光，真係越睇越靚

雞蛋煮熟，一開二

跟包裝指示落兩包醬料煮滾，好香呀

麵條煮七分鐘

再落埋兩隻蝦煮熟

得咗(^O^)

原煲上，好味，呢隻叻沙唔錯，可以再買嚟食

是日敗物

食食吓叻沙，郵差到，呵呵呵，韓國新鮮運到

登登登櫈，紫丁香色花花煲，除咗靚之外，就係靚～

之前香港賣紫丁香，又限量又抽籤，攪一大輪都買唔到，而家韓國出，幾個韓國代購都可以幫人買得到，真係唔洗驚買唔到，點解香港咁難買，嚟緊十一月崇光感謝週，會出新嘅mauve pink，睇吓今次又點安排

檸檬蒜片蝦意粉

今日開學啦，兩個細路返咗學，成間屋靜晒，今日返半日，放十二點，返到嚟匆匆忙忙食午餐，然後去上課外活動，佢地去咗上堂，我先至煮我個午餐，lemon garlic prawns linguine

先預備好材料，蝦去殻去腸洗淨抺乾，一開二

我用呢隻虎蝦，响惠康買，二百幾，有十四隻

意粉跟包裝指示嘅時間煮，份量一般嚟講係一個人一百克，兩個人就兩百克，如此類推，你特別大/細食，就自行加多減少

煮意粉嘅同時，中火落橄欖油同牛油，如果淨係落牛油，會好易燶

蒜頭兩粒切片，少少乾辣椒片，如果唔食辣可以唔落，一個檸檬嘅皮刨絲爆香

將蝦落鑊煮幾分鐘就熟

煮緊蝦嘅同時，意粉都煮好，隔去水份

落鑊一齊兜，加檸檬汁半個、鹽、胡椒粉同parsley

食得啦～

頭先煮俾兩個細路食，每人三隻蝦，佢地話蝦太少，咁到我自己煮，咪落四隻蝦囉，但我又覺得蝦太多^_^;

小朋友真係有食力，多多都唔夠佢地食

是日敗物

收到响eBay買嘅兩個迷你LC

係USB memory stick嚟㗎(^O^)

話梅醉雞翼

返學啦，返學啦，聽日開始返學啦，話咁快就放完暑假，話咁快又一年，話話聲，整個話梅醉雞翼

好爛嘅開場白(^_^)v

我都幾鍾意食醉雞，但兩個細路唔食，十三姨丈都食嘅，但唔係好鍾意，只食少少，所以唔會整一隻醉雞，整雞翼就簡單得多啦

材料好簡單，雞中翼十二隻，話梅五粒，香糟露適量

香糟露嘅包裝紙有教點整

雞中翼解凍後，放入滾水中煮熟

將煮熟嘅雞翼放入冰水，浸到雞翼完全凍晒，大約兩、三個字

將話梅去核，放入容器，倒入香糟露，我啱啱好用晒一支

要浸過雞中翼，雪幾個鐘就食得，想入味D就浸過夜

雪咗幾個鐘，試吓先，酒味淡咗D，呢隻話梅又唔太香，下次買D靚D話梅，同埋要浸過夜

Dan Ryan

當年ifc未開果時，都會時不時去太古廣場睇戲呀、食飯呀、買野呀咁，自從ifc開咗就少咗去，ifc新開，自然係會吸客，去吓去吓，慣咗去ifc又少咗去太古，後尾太古裝修，冇咗food court之後，更加少去，但間唔中會去Dan Ryan同埋超市Great，今日又去Dan Ryan，呢間餐廳開咗咁多年，都冇被淘汰，證明佢有實力

洋蔥湯，芝士好香，湯好飲

當然唔少得水牛城雞翼，汁另上

Cioppino，海鮮湯飯，普普

肉眼扒，不過不失

豬扒，果D唔係紅蘿蔔，係番薯，幾好

呀女鍾意食呢度嘅波菜，好飽呀~~

影片分享，最近日日被冰桶挑戰洗版，呢個籌款活動非常成功，聽聞已籌到超過兩億，大部份都幾好笑，但亦有感動嘅