Le Creuset 開倉 2015 四月

又到咗開倉嘅日子，星期六開始，今日星期一，最受歡迎嘅野應該冇乜啦，我冇諗住買野，一嚟石頭唔啱我，二嚟煲我亦唔需要買，所以都係諗住陪好JM買

約咗好JM兩點去，我先到，睇一睇現場情況先

唔多人，比舊年少人

2:09開始响外面排，前面大約有十個人

2:55放我地呢批上去酒店，又見呢張玫瑰地毯

大約等咗半個鐘，先開始放前面果批攞咗環保袋嘅人入去，等佢地入晒去，就到我地攞環保袋入去另一邊等，我地企咗個幾鐘，終於可以坐响地下等

用環保袋嚟坐

前面果批人清場之後，到我地開始排隊入去，咦？點解前面多咗幾十人嘅？？原來前面果批排隊尾嘅人冇入到去，响度等下一批，咁佢地就變咗隊頭，咁樣係因為佢地知道每放一批人之前會補貨，排隊尾入到去乜都俾人攞晒，排隊頭先有機會買到新補嘅貨，我都冇所謂，因為我都係陪人，同好JM溝通好，佢想要買乜，入去就向目標進發

一入去，我向石頭貨架果邊行，見到一個紫色沙律碗，攞咗，行過D又見到個粉紅色沙律碗，攞埋，即刻有個女人埋嚟問我要唔要到咁多，吓？兩個碗點會要唔到，又唔係二十個@.@

我相信LC係特登將D受歡迎又少嘅貨咁樣放，因為D貨通常係全部放埋一齊，咁樣就會好容易俾人成箱攞晒，而佢今次依度放一個嗰度放一個咁分開放，可以多D人買到，連我呢D唔識搶嘅人都攞到兩個，呢個碗我已經有，都係幫好JM攞，好抵啦，比我响代購度買平一半

另一熱門貨batter bowl，都幾多，我攞咗一個之後，仲見到成十個响貨架，我已經有，所以都係幫好JM攞

Macaroon pink橢圓形碟，不過我覺得太細，冇要到

26cm buffet $2,030一D都唔平喎，我隻紫色响Amazon.it買，連運費都係150歐元

當你冇乜期望嘅時候，又竟然俾好JM搵到隻OB色！！仲要係搵到兩隻，咁都搵到，忍唔住又買咗佢

今次算係滿載而歸

我嘅收穫，25cm OB橢圓形鍋，粉紅同粉紫湯盅，D湯盅呢，唔靚色放响出面，靚色放响裏面，所以只要搵一搵都有，另外好JM幫我搵到個粉紅色焗盅

其他熱門嘅貨都唔見，一個花/心形碟都見唔到，好JM想買嘅心形焗盤亦唔見，明天最後一日，通常最後一日唔補貨，所以要等下次開倉再血拼啦